ኵወግራዅ ኵጊንኵት !!

ለሀክኹለ ወክት፡ ወክት ተክለበጋዅ

ይጐራ ድራተኵ ኣኾ ባሓር ካሳዅ

ኣጛ ሉምዮ ፈረኩን፡ ኒኻ ናዕዮ ዳዳዅ፡

      ናበልጛ ጣንጠነኵ፡ ደርጉና ናሪ ግሮሎም

      ካያ ፈርሲ ፍሪርኑዅ፡ ሰረን ምዅር ታቆሎም

      ከብተውስኻ ብሸት፡ ጃር እዋዅ ስኽር ገቦሎም፡

ኣጛ` ውሪዅ ደዓሎ፡ ንደዓለን ኒሓቅል

ወሪ ክሚራ ኒጂብል፡ ወሪ እንደራ ፍሾትል

ጀማል እሰን ኪደኩለ፡ ላሪ እንጋኽር ይግሪል፡

       ሓልብስተጋዅ ተኮስተዅ፡ ኣኽሮና ይኖ ተምነትናዅ

       ኣን ካያ ኣኽገትክ ኣብዝሓር ደሀይ ዋሰጋዅ

       ጋብረጛ ጨልገማዅ፡ ህምብረጛ ጨነዳዅ

       ብሪ ዓንቀይልድ ፈዅመኒ፡ እማ ዓስተልድ ገማዅ፡

ህምበነኩና ይነከው፡ ህምበነኩኩም እንተከው

ይነትር ተከገው እንተትር ተከገው

ከው ተክለቡኻ ደለመው፡ ከው መህለሉኻ በረጀው፡

ዓይግል ላኻ ቋልኹን ዮ መሓለው፡

        ኣቕትራ ይኒ ኒላውድ፡ ንርቍር ብር፡ ጅእኒልድ

        ሰገራዃ ኣተይኒ ሺራዅልድ ታኽትልድ

        ጐደነዲ ፈደነዲት ፍሪርዶ እንሽኽልድ፡

እልል የሎም ስረጋ ፈርሓት ዳሲ ተከላ

ክስክስተሎም ሽብክት ወሪ ጐልየድ ወለላ

ናፈክ ጃልድ ኣኽኒ እሰውለ ይብራ ኣደራ፡

ግርጋ 22 ነሓሰ 2006

ሙሴ ዓወተ

ስቶክሆልም